Philalethes: Hər şey və heç
bir şey.
Thrasymachos: Gözlədiyim də
bu idi. Bir məsələnin həlli olaraq irəli sürülən bir ziddiyyət. Bu hiylə
köhnəlib.
Philalethes: Immanent bilik
(bilik/Erkenntniß) üçün yaradıl-mış dildə transsendent suallara
cavab tapmaq qaçınılmaz olaraq ziddiyyətlərə yol açar.
cavab tapmaq qaçınılmaz olaraq ziddiyyətlərə yol açar.
Thrasymachos: Nəyə
transsendent , nəyə immanent bilik deyirsiniz siz? Bu ifadələr haqqında
məlumatım olduğu doğrudur, professorum istifadə edirdi, amma o sadəcə
qadiri-mütləq Tanrının predikatları olaraq istifadə edirdi bu ifadələri, ki
onun fəlsəfəsi yalnız bunun kimi şeylərlə əlaqədar idi və bunlar o cür
məsələlər üçün yeganə doğru və uyğun təbirlərdir. Bu səbəbdən o əgər dünyanın
içərisindədirsə immanent, dünyanın xaricində bir yerdədirsə transsendent oraq
qəbul edilir. Baxın, kifayət qədər açıq və anlaşılan deyil mi? Burada nə
haqqında danışdığımızı bilirik. Lakin(köhnəlmiş) Kant fəlsəfəsi təbirlərindən
kim nə anlayar? Alman elm metropolisindən yayılan hakim qənaət –
P(özü-özünə danışaraq): Alman
fəlsəfəsi boşboğazlığı.
T: -bütün bir böyük adamlar
silsiləsi ilə, xüsusilə tanınmış Schleiermacher və böyük baş Hegel ilə bütün
bunlardan geri çəkilmiş və ya daha doğrusu, o qədər irəli aparılmışdır ki,
bütün bunları arxasında buraxmış və artıq bunları tanımaz, haqqında danışmaz
olmuşdur. Bəs siz bunlarla nəyi nəzərdə tutursunuz?
P: Transsendent bilik mümkün
təcrübə hüdudlarını keçib şeylərin təbiətini olduqları kimi müəyyən etməyə
çalışan bilikdir. Bundan fərqli olaraq immanent bilik özünü mümkün təcrübə
hüdudlarının içində saxlayar və bu səbəbdən dolayı etibarlılıq sahəsi
fenomenlərlə məhduddur. Bir fərd olaraq ölümlə birlikdə varlığınız sona çatar,
lakin fərd sizin həqiqi və mütləq özünüz deyil, daha çox onun bir təzahüründən
ibarətdir. O özündə şey deyil, lakin sadəcə onun zaman forması içində özünü
göstərən və bu səbəbdən bir başlanğıcı və sonu olan fenomenidir. Bundan fərqli
olaraq sizin həqiqi özünüz nə zaman, nə başlanğıc, nə son, nə də müəyyən bir
fərdiliyin hüdudlarını tanıyır. Bu səbəbdən dolayı fərdilik onsuz ola bilməz,
amma o onların hər birində və hamısında var. Buna görə ilk anlamda ölümlə
birlikdə varlığınız sona çatacaq; ikinci anlamda var olacaq və hər şeydə
varlığınızı davam etdirəcəksiniz. Bu səbəbdəndir ki, sizə ölümdən sonra hər şey
və heç bir şey olacağınızı dedim. Verdiyiniz suala bu qədər qısa bir zamanda
bundan daha doğru cavab çətin tapılar, əlbəttə bu cavab içində bir ziddiyyət
daşıyır, çünki həyatınız zamanda, ölümsüzlüyünüz isə sonsuzluqdadır. Buna görə
ölümsüzlüyünüzün yox edilə bilməyən, amma yenə də davamlılığı olmayan bir şey olduğu
deyilə bilər, ki bu da yeni bir
ziddiyyətə yol açar. Amma transsendent olan immanent biliyin hüdudları
içərisində danışılmağa çalışılanda hər zaman olacaq olan budur: çünki o zaman
belə bir bilik, nə üçün doğulmuşsa onun üçün istifadə olunacağı yerdə yanlışlıqla
doğulmadığı şey üçün istifadə olunduğuna görə bir növ məcbur edilməyə məruz
qalmış olur.
T: Baxın, fərdiliyim davam
etmədiyi halda sizin o ölümsüzlük deyə danışdığınız şeyə qəpik belə vermərəm.
P: Bəlkə də buna rəğmən
sizinlə sövdələşə bilərik. Deyək ki, sizə fərdiliyinizin davamı üçün zəmanət
verdim, amma bu zəmanət qarşılığında da bu fərdiliyin yenidən oyanmasından
əvvəl bütünlüklə şüursuz 3 aylıq bir ölüm yuxusunu bir şərt olaraq irəli
sürdüm.
T: Bu şərti qəbul edərəm.
P: Çox yaxşı, indi tam bir
şüursuzluq vəziyyəti içində qətiyyətlə heç bir zaman ölçüsünə sahib
olmayacağımız üçün biz bu ölüm yuxusuna yatarkən şüur dünyasında istər üç ay,
istərsə də on min il keçmiş olsun, bizim üçün heç fərq etməyəcək. Çünki
qalxdığımızda inanc və güvənə bağlı olaraq birini də ən az digəri qədər qəbul
etməyə hazır vəziyyətdə olmağımız lazım olacaq, bu səbəbdən fərdiliyinizin
istər üç ay, istərsə də on min il sonra geri verilmiş olmasının sizin üçün
önəmli olan bir tərəfi olmayacaq.
T: Son təhlildə bu əlbəttə
inkarı mümkün olmayan bir şeydir.
P: İndi hesab edək ki, on min
il sonra oyandıracaq kimsə sizi oyandırmağı unutdu. Belə güman edirəm ki, belə
bir qəza çox qısa bir varoluşun ardından çox uzun sürən bir var olmayış
vəziyyətinə bu qədər öyrəşdikdən sonra böyük bir talehsizlik olmazdı. Fəqət
burası dəqiqdir ki, ona dair hər hansı bir şey hiss edə bilməzdiniz; mövcud
fenomenal varlığınızı həyatda tutan sirrli qüdrətin bu on min il boyunca eyni
növdən başqa fenomenal varlıqları meydana gətirib hərəkətə keçirməkdən bir an
belə geri durmadığını bilsəydiniz bu məsələ ilə bağlı olaraq yenə rahatlıq
duyardınız.
T: Elə mi? Və beləcə siz
səssiz sədasız və hiss etdirmədən mənim fərdiliyimi hiylə ilə əlimdən
alacağınızı hesab edirsiniz? Fəqət məni bu şəkildə aldada bilməzsiniz. Mən
fərdiliyimin qorunacağını şərt qoymuşdum və onun itməsi halında nə sirrli
güclər, nə fenomenlər məni təsəlli edə bilər. O mənim üçün çox qiymətlidir və
onun əlimdən alınmasına izn verməyəcəyəm.
P: O halda siz fərdiliyinizi
o qədər xoş, gözəl, mükəmməl və bənzərsiz görürsünüz ki, sizin üçün onu
üstələyə biləcək heç bir şey yoxdur; və bu səbəbdən dolayı siz onu, daha yaxşı
və daha rahat yaşamağın mümkün olduğu irəli sürülə biləcək bir şey olsa belə,
heç bir şeylə dəyişməyə yanaşmırsınız.
T: Baxın, mənim fərdiliyim,
nə olursa olsun, mənim parçamdır, o mənəm.
Mir geht nun auf der Welt nichts
über mich:
Denn Gott ist Gott, und ich bin ich.
(Bu dünyada heç nə məndən üstün
deyil
Çünki Tanrı Tanrıdır, mən də mən.)
Mən, mən, mən, var olmaq istəyirəm! Mənim üçün önəmli olan, ən çox dəyər
verdiyim şey budur, mənə aid olduğuna inanmaq üçün öncə razı salınmağıma
ehtiyac olan varoluş deyil.
P: İndi baxın! Bu “Mən, mən,
mən var olmaq istəyirəm” deyə fəryad edən sadəcə siz deyil, lakin hər şey, qəti
olaraq hər şeydir, hətta ən kiçik bir şüur əlaməti daşıyanı belə bunun
kənarında deyil. Bu səbəbdən sizdəki bu arzu şübhəsiz ki, fərdi olmayan, amma
hər kəs üçün müştərək bir şeydir. O fərdilikdən deyil, fəqət ümumi olaraq varoluşdan
qaynaqlanır və var olan hər şeyin təməlini təşkil edər, hətta hər şey onun
sayəsində varoluşa sahip olur; bu səbəbdən o yalnız müəyyən bir fərdi varoluşla
deyil, ancaq ümumi olaraq varoluşla maraqlanır və ancaq onunla qane olur. Çünki
o, hər nə qədər hər zaman belə görünürsə də, mütləq bu cür bir fərdi varoluşu
hədəfləməz, zira o bir fərdi varlıqda olmadıqca başqa cür şüura çata bilməz və
bu səbəbdən dolayı hər zaman sadəcə onunla maraqlanmış kimi görünür. Ancaq bu
fərdin dar düşüncəliliyi ilə toruna düşdüyü, amma təfəkkürün dağıdıb bizi xilas
edə biləcəyi bir yanılmadan başqa bir şey deyil. Çünki bu qədər şiddətlə
varoluşu arzu edən şey sadəcə bilvasitə olaraq fərddir; birbaşa və uyğun
ifadəsi ilə o ümumi olaraq yaşama iradəsidir ki, hər şeydə bir və eynidir. İndi
varoluşun özü iradənin sərbəst işi, daha doğrusu iradənin bir əksindən ibarət
olduğu üçün varoluş iradədən qaçıb qurtula bilməz. Fəqət iradə ümumi olaraq
varoluşla ancaq müvəqqəti qane ola bilər, daha doğrusu əbədiyən qane edilməmiş
iradə nə qədər qane edilə bilirsə ancaq o qədər qane edilə bilər. Onun yanında
fərdiliklərin bir-birindən fərqi yoxdur; hər nə qədər onu ancaq özündə birbaşa
dərk edən fərdə özləri haqqında danışır kimi görünürsə də, o əslində onlardan
söz etməz. İradənin bu öz varoluşunu başqasından daha diqqətli qoruması və
beləliklə növlərin davamını təmin etməsi bunun bir nəticəsidir. Buradan
fərdiliyin bir mükəmməllik deyil, bir məhdudlaşma səbəbilə ondan qurtulmanın da
bir itki deyil, əksinə bir qazanc olduğu özlüyündən anlaşılır. Bu səbəbdən
dolayı, əgər təbiətinizi tamamilə və onu əsl təməlinə qədər-yəni bir parçası
olduğunuz dünyəvi həyat iradəsi olaraq-tanısaydınız sizə uşaqcasına və tamamilə
gülünc görünəcək bir qorxunu içinizdən atardınız.
T: Əslində, siz özünüz və
bütün filosoflar uşaqcasına və tamamilə gülüncsünüz! Mənim kimi ciddi və ağır
başlı biri bu cür axmaqlarla on beş dəqiqəlik bir söhbəti ancaq əylənmək və
vaxt keçirmək üçün edər. Görəcək çox daha önəmli işlərim var. Sağ olun. Tanrı
sizə kömək olsun!
Tərcümə edən: Könül Bəndiyeva
Mənbə: Artur Şopenhauer "Ölümün mənası", "Dialog formasında kiçik bir başlanğıc"
Yorumlar
Yorum Gönder