Film analizi: "Halloween" - John Carpenter (1978)

Qorxunun gecəsində gəlir. Pislik-yaxşılıq, nifrət-sevgi...Heç bir anlayışı yoxdur öldürməkdən başqa. Jon Carpenterin 1978-ci ildə çəkdiyi kult olmuş slasher növündəki Halloween filmindən Dr. Loomisin Michael Myers haqqındakı təməl fikiridir. Film analizi, ya da kinomatoqrafiya incələməsi olaraq yox, kinoya qarşı şəxsi
fikirlərim olaraq demək istəyirəm.

Jon Carpenterin “The Thing” filmindən sonra ən bəyəndiyim, klassik slasher filmlərinin içində isə ən xoşuma gələnidir. Filmdəki Michael Myers 6 yaşında böyük bacısını öldürərək qatil fəaliyyətinə başlayır. Başlanğıcda əsas motivasiya qaynağı "evlilikdən kənar cinsi əlaqəyə girənlər cəzalanmalıdır" prinsipi idi ki, bu Jon Carpenterin sevdiyi stildəndir və klassik slasherlərdən sonra bu məşhur klişeyə çevrilir. Bununla Michael Myers bir növ bacısını cəzalandırır. Sonrakı filmlərdə də cinsi əlaqədə olan bütün cütlüklər Michael Myers tərəfindən öldürülür. Dəlixanada keçirdiyi 15 ilin ardından qaçaraq geri qayıdır və dəhşət saçmağa başlıyır. Filmin əvvəlində psixiatr Dr.Loomis onu saf pislik adlandırır. Davamında və sonrakı seriyalarında bu motivasiya qaynağı bacılara, ondan sonra isə "Omen" yəni şeytan, kelt ritullarına və s. keçir.

Foley və səs dizaynı filmin səhnələri üstündə çox böyük təsirə malikdir. Cinayətlərin görüntü olaraq təsirini artırmaq üçün səs effektləri artırılmış və inkşaf etdirilmişdir. Səs effektləri cinayətləri vurğuluyur və izləyici üçün daha unudulmaz edir.

Filmin rəngləndirməsidə tərzini gücləndirir, film boyunca çox sayda qara və qırmızı rəngdən istifadə edilmişdir. Qara rəng qaranlığı və pisliyi çağrışdırır. Bunu Michaelin paltarında və olduğu səhnələrdə rahatlıqla görürük. Qırmızı isə qanı və təhlükəni ifadə edir, ölüm səhnələrində həmişə görülür və bir neçə dəfə yanıb sönür; bu qatilin nə vaxt hücum edəcəyini açıqca göstərir.

Filmdə ən bəyəndiyim xüsusiyyətlərdən biri gərilimin səhnələrə yox, bütün filmə yayılmasıdır. Belə desək qorxu filmində anidən olan adamı diksindirən səhnələr yerinə əvvəlcədən bilinən amma adamı gərən səhnələr yer tutur. Filmdə hər obraz ölə bilər. Sevdiyim cəhətlərindən biridə qəribə formalarda ölüm səhnələri yox qatilin adi formada məsələn, kiminsə qabağına çıxıb bıçaqlayaraq öldürməsidir. Rejissor qan və effekt yerinə daha çox real qorxu və yaxşı hekayə verir. İnsanlar qorxunun və saf şərin gecəsində - Halloweendə onu gözləməməklə böyük səhv edirlər.

Halloween slasher sevənlərin mütləq izləmələri olan bir filmdir.

Amin Məmmədzadə