Azərbaycanda ilk dəfə olaraq bu yay "Yay Fəlsəfə
Məktəbi" adlı ardıcıl fəlsəfə təlimləri təşkil olundu. Layihə Bakı Dövlət
Universitetinin bir qrup tələbəsi və həmin universitetin Fəlsəfə tarixi
və mədəniyyətşünaslıq kafedrasının müəllim heyəti tərəfindən yaradılmış
Bəhmənyar Klubu tərəfindən təşkil olunurdu. Bəhmənyar Klubu artıq 1 ilə yaxın
müddətdir ki, Azərbaycanda fəlsəfə sahəsində mühüm işlərə imza atmaqdadır.
Bir neçə ay öncə klubun təşəbbüsü ilə tələbələr
tərəfindən fransız dilindən tərcümə edilmiş "Ekzistensializmin tarixi"
adlı kitab işıq üzü görmüşdü. Bəhmənyar Klubu eyni zamanda sosial şəbəkələr
vasitəsilə də məqalə, bədii esse, kitab analizi, incəsənət və ən əsası da
fəlsəfə kimi istiqamətlərdə fəal maarifçilik təşəbbüsünü davam etdirir.
Bu baxımdan "Yay Fəlsəfə Məktəbi"
layihəsi də klubun növbəti böyük uğurlarından biri hesab oluna bilər. Əvvəlcə
onu xatırlatmaq yerinə düşər ki, ölkəmizdə müxtəlif sahələrdə ardıcıl təlimlər
və məktəblər fəaliyyət göstərmiş olsa da, sırf fəlsəfəyə istiqamətlənmiş və
sırf fəlsəfənin tədris edildiyi belə bir layihə ilk dəfə idi baş tuturdu.
Təlimlər 1-15 iyul 2019-cu il tarixləri arasında Af Mall ticarət mərkəzinin II
mərtəbəsində Akademi Group-da, iştirakçıların yay asudə vaxtlarını və hava
şəraitini də nəzərə alaraq təlimlər saat 17:00-19:00 arası müddətdə baş
tuturdu.
Layihə çərçivəsində 6 təlim baş tutmuş və
təlimlər Bakı Dövlət Universitetinin ixtisaslı müəllim, doktorant və
magistrantları tərəfindən tədris edilmişdi. Təlimlərdə müzakirə olunan mövzular
haqqında Bəhmənyar Klubunun sədri Fərhad Seyfullazadə qeyd edir: "Yay
Fəlsəfə Məktəbi" çərçivəsində çalışdıq ki, ilk öncə iştirakçılara
fəlsəfənin nə olduğunu başa salaq. Çünki çoxu gənc hətta universitet bitirmiş
olsa belə fəlsəfənin nə olması ilə bağlı orjinal bir fikirlərə malik deyil. Bu
baxımdan ölkəmizdə fəlsəfəni belə demək mümkündürsə, yenidən diriltməyə
çalışdıq. Uğurlu da olduq. Bunu əminliklə deməliyəm. Ən azından təlimlərimizdə
iştirak edən gənclərin haqqımızda müsbət fikirləri bunu deməyə imkan
verir".
"Yay Fəlsəfə
Məktəbi" çərçivəsində keçirilən təlimlərdə mühazirəçi qismində çıxış edən
və Bəhmənyar Klubunun üzvlərindən olan Araz Əliyev də təlim haqqında öz fikirlərini
bildirdi: "Etiraf etməliyəm ki, təlimlər haqqında ilk fikirlər ağlımıza gələndə
bu qədər uğurlu olacağını təxmin etməmişdik. Artıq uzun illərdir ki, fəlsəfə
ölkəmizdə sadəcə problem yaradan bir şey kimi başa düşülürdü. İnsanların fəlsəfəyə
olan münasibəti də birmənalı deyildi. Həmı fəlsəfədən qaçırdı. Daha dərinə getmək,
az bilincə xoşbəxt olmaq kimi ifadələr dilimizdə oturuşmuşdu artıq. Belə bir
mühitdə və zamanda fəlsəfəci olmaqdan daha çətin bir şey düşünmürəm. Hər
inkişafın, tərəqqinin əsasında fəlsəfənin dayandığı bir həqiqətdir. Fəlsəfə təməl
olmadan hər hansı ideya, ya da fikir qalib gələ bilməz. Bunun üçün də ilk öncə
fəlsəfi təməl hazırlanmalıdır. Biz də indiki anda bacara bildiyimiz tək şeyi, fəlsəfəni
insanlara təqdim etməyi seçdik. Fəlsəfə universitet auditoriyalarında danışılan
bir şey olmaqdan çıxmalı, adi insanların belə haqqında danışdığı fenomen olmalı
idi. Çünki, bizi narahat edən çox problemin cavabını verə bilərdi bizə. Fəlsəfə
düşünmək deməkdir bizim fikrimizcə. Təlimlərdə də dediyimiz kimi, biz fəlsəfə
öyrətmirdik, iştirakçılarla birlikdə fəlsəfə yaradırdıq"
Təlimlərin təşkili ilə bağlı maliyyə məsələlərinə də münasibət
bildirən Fərhad Seyfullazadə, layihənin təşkilində Akademi Groupun rəhbəri
Murad bəyə, Simurg İntellektual Oyunlar Klubuna və xüsusilə Gursel Abbas bəyə
təşəkkür etməli olduqlarını qeyd etdi. Bəhmənyar Klubu üçün təmənnasız yer
imkanı təmin etdikləri və göstərdikləri güvən hissi hər nə qədər üzdə görünməsə
də təlimlərin uğurlu keçməsinin, bəlkə də, ən əsas səbəbi idi. Bununla bağlı
olaraq Fərhad Seyfullazadə qeyd edir: "Əgər siz isti yay günündə təlim
keçirməyi düşünürsünüzsə, təlimçinin biliyindən və nə dediyindən daha çox
önəmli oan şey kondisionerin işləməsi, sərin su ehtiyyatınızın olmasıdır. Əgər
Akademi Group bizə bu imkanı təmin etməsəydi, təlimlərin keyfiyyətini təxmin
edə bilməzdik. Təbii ki, mühazirəçilərin də rolunu kiçiltmirəm. Emin Kərimovun,
Araz Əliyevin, Əhəd Əhədlinin, Aqşın Aşırovun rolu bizim üçün danılmazdır. İyul
ayında artıq universitet tətilə çıxmış olsa da, bizim üçün yenidən açılmışdı.
Özünü tələbə kimi hiss etməkdən daha gözəl bir şey ola bilməz məncə"
Xatırladaq ki, "Yay Fəlsəfə Məktəbi" çərçivəsində ilk
dəfə olaraq mühazirə tipli təlimlərlər yanaşı 2 qarşılıqlı müzakirəyə əsaslanan
təlimlərə də yer verilmişdi. Araz Əliyevin fikrincə: "Başa düşürdük ki,
istənilən bir insan üçün gəlib 2 saat fəlsəfə dinləmək o qədər də xoş deyil.
İnsanlar öz fikirlərinin səslənməsinə daha çox önəm verirlər. Fəlsəfə də
insanların fikirlərində maddiləşdir. Ona görə iştirakçılara da bizimlə birlikdə
çıxış etmək imkanı verməyi uyğun gördük. İmmanuel Kantın dediyi kimi, fəlsəfə
öyrədilmir, fəlsəfə yaradılır".
"Yay Fəlsəfə Məktəbi" layihəsində iştirakçı sayı ilə
bağlı suallarımıza Fərhad Seyfullazadə belə cavab verdi: "Təlimlərin
elanını verdiyimiz vaxt gecikdiyimizi düşünürdük. Lakin elanın ilk günündəcə 50
nəfərdən çox müraciət vardı artıq. İrəlidəki günlərdə də bu say demək olar ki
iki dəfə artdı. Artıq təlimlərə 3 gün qalmış qeydiyyatı dayandırmaq qərarına
gəldik. İştirak etmək istəyənlərin sayı isə 104 nəfər təşkil edirdi. Bizim üçün
seçim çox çətin idi. Çünki iştirakçıların əksəriyyəti daimi olaraq yazır, zəng
edərək seçilmək istədiklərini bildirirdilər. Edə biləcəyimiz bir şey yox idi.
Biz də qərara gəldik ki, ancaq tələbə və daha gənc olan iştirakçıları seçək.
Lakin yenə də 25 nəfər planladığımız təlimçi sayı 45 nəfərə qədər qalxdı. Hələ
qeydiyyatsız gələn iştirakçıları saymıram. Ən maraqlısı isə 30 nəfərə yaxın
iştirakçının bütün təlimlərdə iştirakı ilə bağlı idi. Bu müstəsna bir rəqəm
idi. Ən maraqlısı isə müraciətlər içərisində orta məktəb şagirdlərinin də adları
var idi. Hələ Rüstəm adlı 16 yaşlı iştirakçımız bütün təlimlərdə bizimlə
bərabər iştirak etdi, suallar verdi. Nə demək olar ki?! Azərbaycanda fəlsəfəyə
bu qədər marağın olması.. Sadəcə möhtəşəmdir"
Təşkilatçılar təlimləri 2 həftəlik bir müddətdə yekunlaşdırmağı
yay fəslini və insanların asudə vaxtlarına müdaxilə etməmək üçün etdiklərini
qeyd etdilər.
"Yay Fəlsəfə Məktəbi" gənclərin öz təşəbbüsləri ilə təşkil
etdikləri mühüm uğurlardan biridir. Bu təkcə Bəhmənyar Klubunun deyil, bütün
Azərbaycan gəncliyinin uğurudur. Azərbaycan gəncliyini öyrənmək eşqi, marağı,
bacarığı ilə birlikdə görmək gələcəyə olan inamımızı daha da gücləndirir.
Müstəqil Azərbaycanın fəlsəfəsi siz gənclərin əlindədir. Bu layihələr gələcək
nəsillər üçün olduqca kiçik bir addımdır, lakin daha böyük və əmin addımların
başlanğıcıdır. Səsinizin daha yüksəklərdən gəlməsi diləyi ilə.. Təşəkkürlər
Bəhmənyar ailəsi !
Bəhmənyar Klubu, təlimçilər
və iştirakçılar adından "Yay Fəlsəfə Məktəbi" layihəsində yaxından
iştirak etdikləri üçün klubumuzun dəyərli üzvlərindən Xəyalə Zeynalova və Rövşən
Nəzərova, yaxın dostlarımız olan Kənan Abdullayev, Rövşən Əliyev, Salman
Qafarova öz təşəkkürlərimizi bildiririk. Var olun, dostlar
!
"Yay
Fəlsəfə Məktəbi" çərçivəsində təlimlərdə iştirak edən şəxslər 3 növ
sertifikatla təltif olunublar. Sertifikatlardan ilki bütün təlimlərdə iştirak
edən şəxslərə verilib və "Filosof" adlandırılıb. "Döyüşçü"
adlanan ikinci dərəcəli sertifikat isə 1 və ya 2 təlimdə iştirak etməyən şəxslərə
verilib. Üçüncü və "Sənətkar" adlanan sertifikat növü isə daha az
sayda təlimdə iştirak edən şəxslərə verilib. Təşkilatçılar sertifikatları Antik
Yunan filsofu Platonun ideal dövlətində nəzərdə tutduğu təhsil sisteminə uyğun
olaraq müəyyən etdiklərini bildirdilər.
Yorumlar
Yorum Gönder