Aha, axır gəlib çatdı.
Havada olan yandırıcı isti onu lap əldən salmışdı. Alın tərini üstündə olan
quru salfetlə silib metro stansiyanın pilləkənlərini bir-bir geridə qoymağa
başladı. Hətta ayağı sürüşüb birində az qala yıxılacaqdı. Ancaq birtəhər qamətini
düzəldib pilləkənin hər mərtəbəsini ustalıqla fəth edirdi. Nəhayət,
pilləkənlərlə qaçılmaz dueldən alnı açıq, üzü ağ çıxmağı bacardı.
Biraz da qürurlandı. İlk cəhdi böyük uğurla başa vurmuşdu..
Biraz da qürurlandı. İlk cəhdi böyük uğurla başa vurmuşdu..
Giriş hissədə kartının balansını artırmaq üçün dayandığı növbə onu lap
əsəbləşdirdi. "Nə çətin işdir axı karta pul yükləmək? Bu qədər
adam növbə yaradıb?" - amma bu sual cavabsız qaldı. Çünki heç sualı dilinə
gətirməmişdi. Sadəcə çox adam kimi ürəyindən keçirmişdi. Və budur növbə ona
çatdı. Əlindəki yükünü sakit yerə qoyub bütün ciblərində kartını axtarmağa
başladı. Gözünü yumduğunda əlini bir cibində, açıldığında isə digər cibində
görmək olardı. Bir göz qırpımı qədər sürətli. Yekun olaraq axtarış tədbirlər,
nəhayət, öz məntiqi sonluğuna qovuşdu. Necə deyərlər, axtaran tapar və tapdı.
Atalara onu hərəkətə gətirən bu cümlə üçün təşəkkür etməyəcək qədər tələsərək
cibindəki əzilərək qəribə formaya düşmüş bir manatlıq əskinası ödəmə
terminalına daxil etdi. Daha sonra arxada onu başdan-ayağa süzən narazı
baxışların fonunda oradan uzaqlaşdı..
Sonunda ayaq səslərini
metropolitendə eşitdirməyi bacardı. Bu zamana qədər hələki rahatlıqla müxtəlif
səviyyələri adlaya bilirdi. İndi isə növbəti yarış üçün qollarını çırmalamağın
zamanı idi. Lakin hələ qatarın gəlişi üçün bir neçə əzabverici dəqiqə
keçəcəkdi. Bu dəqiqələr bəlkə də, yalnız metro stansiyalarında xüsusi olaraq
istifadə olunan ən uzun dəqiqələr idi. Qolundakı saatına baxdı. Gecikmək üçün
səbəb axtarmağa başladı. Müttəhim kürsüsündə isə məhz gecikməsinə səbəb olan
qatarı əyləşdirəcəkdi. Artıq qatara minmək üçün adamlar bir qədər addımlarını
irəli ataraq hüdud xəttinə yaxınlaşdılar. Start fitini yaxınlaşdıran saniyələr
ən həyəcanlı anlar olaraq qalacaqdı. O, bir əlindəki yükə, bir də qatara
minməyə hazırlaşan insan izdihamına baxdı. Yarış üçün əlverişli formada
deyildi. Onu asanlıqla ötüb keçəcəkdilər. Həm də bir göz qırpımında. Bir
möcüzənin gücünə inanırdı, hans ki, onu bir an içində qatarın içində bərqərar
etsin. Amma çox təəssüfedici haldır, iyirmi birinci əsr uçan xalçalar, sehirli
çıraqlar, qeyri-adi möcüzələr əsri sayılmırdı. İndi başını qaşımağa belə vaxt
itirəcəksənsə, bundan imtina etməliydin. Əks halda məğlubiyyəti dadacaqsan. Və
hətta ən dadlı yerindən. Gecikmək olmazdı. Bir an belə. Nəhayət, qatarın
işıqları tunelin qurtaracağında görünməyə başladı. Hər kəs yerini rahatladı.
Onun gözlərini çox kiçik zaman dilimində parıltı bürüdü. Az qala qulaq
pərdəsini dəlib keçən siqnal səsindən sonra qatar platformada dayandı. Qapılar
açılacaqdı. Fəqət səbirsizlikdən qapını özü açmağa çalışanlar da gözündən
qaçırmadı. Açılan kimi isə hamı sürətlə qatarda yerini tutmağa çalışdı. O,
biraz qarşısındakı mənzərəni seyr etməkdə davam etsəydi, növbəti qatarı gözləmək
üçün can çəkişəcəkdi. Birtəhər qapıların bağlanmağına az qalmış özünü qatara
saldı. Onu təbrik etmək olardı. Növbəti yarışdan üzü ağ çıxmağı bacarmışdı.
Qarşıda nəyin və nələrin olacağı bəlli deyildi. Amma indiki an hər şey
qaydasında idi. Hətta vaqonda isti və boğucu hava olsa belə. Buna dözmək də
olardı. Lakin növbəti qatar üçün dəqiqələrə ürəyi dözməyəcəkdi. Növbəti
stansiya onu bir qədər də evinə yaxınlaşdırdı. Qatardan artıq düşəcəkdi. Özünü
yenə səfərbərlik üçün hazırladı. Bu artıq sonuncu yarış olacaqdı. Sevinməyə hər
keçən saniyə onu yaxınlaşdırırdı. Sonunda qatarın sürətinin yavaşladığını hiss
etdi. Əlindəki yükünü bir qədər də ovucuna sıxıb düşməyə hazlaşdı. Qapılar
açılar-açılmaz artıq o nəfəsini platformada hiss etdirdi. Xoşbəxt idi. Təbəssüm
üzünü sarımışdı. Bunu da bacarmışdı..
Eskalatora doğru əmin
addımlarla irəliləməyə başladı. Yuxarı doğru qalxarkən gözünə divarda asılmış
lövhə tuş gəldi. Lövhədəki cümlə onun az öncə sıraladığı qələbələrini
məyusluqla unutdurdu. Orada yazılmışdı : " Metro yarış meydançası deyil
"
Elmir QULİYEV
Yorumlar
Yorum Gönder