Alfred
Nort Vaythed qeyd edirdi ki, Qərb fəlsəfəsi bütövlükdə Platon fəlsəfəsinə
verilmiş haşiyədən ibarətdir. Bu məntiqə əsaslandığımız da Orta əsrlər Avropa fəlsəfəsinin
formalaşmasına təsir göstərmiş amillər içərisində Platon ideyalarının xüsusi əhəmiyyətə
malik olmasının şahidi oluruq. Ümumilikdə isə Orta əsr Avropa fəlsəfəsini Antik
fəlsəfənin və Platon ideyalarının davamı olan Yeni-paltonizm
və Yəhudi - Xristian dini dünyagörüşü ilə qarşılıqlı əlaqəsinin məntiqi nəticəsi hesab etmək olar. Fəlsəfə tarixi ilə bağlı aparılan araşdırmalar bizə heç də Vaythed-in qeyd etdiyi kimi Qərb fəlsəfəsinin formalaşmasında Platonun deyil, onunla yanaşı digər önəmli filosof hesab edilən Aristotelin də yetəri qədər və bəzən daha üstün formada təsirinin olduğunu göstərir. Bu təsirin xüsusiyyətləri isə bəzi müəlliflərin qeyd etdiyi kimi Aristotelin Şərqli mənbələrdən Avropa fəlsəfəsinə keçdiyi yönündəki fikirlərin əksinə olaraq, xristian Avropanın özü tərəfindən müəyyən olunmuşdur. Bu baxımdan Qərb fəlsəfə tarixində fəlsəfi düşüncənin uzun müddət hakim olan Platon ideyalarından Aristotel məntiqinə meyllənməsini fəlsəfə tarixi problematikası mövqeyindən nəzərdən keçirmək ehtiyacı yaranır.
və Yəhudi - Xristian dini dünyagörüşü ilə qarşılıqlı əlaqəsinin məntiqi nəticəsi hesab etmək olar. Fəlsəfə tarixi ilə bağlı aparılan araşdırmalar bizə heç də Vaythed-in qeyd etdiyi kimi Qərb fəlsəfəsinin formalaşmasında Platonun deyil, onunla yanaşı digər önəmli filosof hesab edilən Aristotelin də yetəri qədər və bəzən daha üstün formada təsirinin olduğunu göstərir. Bu təsirin xüsusiyyətləri isə bəzi müəlliflərin qeyd etdiyi kimi Aristotelin Şərqli mənbələrdən Avropa fəlsəfəsinə keçdiyi yönündəki fikirlərin əksinə olaraq, xristian Avropanın özü tərəfindən müəyyən olunmuşdur. Bu baxımdan Qərb fəlsəfə tarixində fəlsəfi düşüncənin uzun müddət hakim olan Platon ideyalarından Aristotel məntiqinə meyllənməsini fəlsəfə tarixi problematikası mövqeyindən nəzərdən keçirmək ehtiyacı yaranır.
Platon
ideyalarından Aristotel məntiqinə keçid, eynilə xristian fikir adamlarının
Antik fəlsəfəyə müraciət etdikləri dönəmlərdə(Platon və Yeni-platonçular)
olduğu kimi Xristianlığın dini yönlərinin məntiq vasitəsilə əsaslandırılması məqsədini
daşıyırdı. Erkən dönəm xristian ilahiyyatçısı hesab edilən Origen Tanrıdan
başqa heç bir şeyin cisimdən kənarda mövcud olmadığını qeyd edirdi. O,
Platondan bəhrələnərək insanların ruhlarının onların doğuşu zamanı başqa yerdən
gəlməsi fikrini müdafiə edirdi. Eynilə Platonda olduğu kimi Origenə görə də ruhlar insandan əvvəl mövcud idi.[5, səh
62] Aristotelə görə, isə ruh ancaq insan bədənində mövcud idi, O, Platonu
ideyaları (Aristoteldə forma)
duyğular vasitəsilə qavranıla bilən dünyanı bir-birindən ayrmaqda ittiham
edirdi və onun fikrincə ruh insandan öncə mövcud deyildi. Bu fikirlər Platon fəlsəfəsindəki
ruhun ölümsüzlüyü ideyasının Xristianlıq tərəfindən daha rəğbətlə qarşılanması
üçün yetərincə uyğun idi. Platon fəlsəfəsi Avqustinə qədərki dövrdə
Xristianlıqla əhəmiyyətli dərəcədə qarışdırılmamışdı. Origenin özündə belə Xristianlıq
və Platon fəlsəfəsi yanyana öz mövcudluğunu davam etdirirdi. Avqustinin Platon
fəlsəfəsinə münasibəti isə yaradılış məsələsində Platondan fərqli istiqamətə
yönəlmə ilə müəyyən olunurdu. Platonun Demiurgu dünyanı yaratmaq üçün ilkin
maddəyə ehtiyac duyurdu. Avqustin isə belə bir amilin varlığını qəbul etmirdi.
Beləliklə də Palton fəlsəfəsi və Xristianlıq qarşılıqlı vəhdətdə götürülür,
qarışdırılırdı.
Rasselin ifadə etdiyi formada Katolik fəlsəfəsinin
ilkin dönəmlərində əsas aparıcı istiqamət Avreli Avqustinin fəlsəfəsi idi.
Avqustin üçün Platon digər bütün filosoflardan daha üstün olan biridir. Onun
fikrincə bütün digər filosoflar çəkilməli və Platona yer verməlidirlər. Çünki
bütün digər Yunan filosofları əsasən maddə əsaslı düşüncəyə malik idilər, Platon
isə ideyalardan danışırdı. O, tanrının cismani bir varlıq olmadığını, əksinə
bütün digər şeylərin öz varlığını tanrıdan, dəyişməz olandan aldığını qeyd
edirdi. İnsanın duyğular vasitəsilə qavrayışı onun fikrincə dünyadakı doğruları
və həqiqəti tapması üçün əsas deyildi. Avqustinin düşüncəsinə görə, məntiqi və əxlaqı
ən yaxşı olan Xristianlığa ən yaxın olan düşüncə sahibləri Platonçular idi.
Plotin isə Platonu ən yaxşı başa düşmüş olan insan idi. Aristotel Platondan
aşağı filosof idi, lakin digər filosoflardan üstün idi.[5, səh 103] Həm Platon,
həm də Aristotel bütün tanrıların yaxşı
olduğunu və sitayişə laiq olduqlarını qeyd edirlər. Avqustinusa görə isə,
Platonçular tanrı haqqında ifadə etdiklərini fikirlərində haqlı idilər, lakin
onların ümumi tanrılar haqqında söylədiklərini fikirləri ilə razılaşmaq
olmazdı. Platon “Timeos” dialogunda
insanın tanrı tərəfindən birbaşa olaraq yox, bilavasitə yolla, daha aşağı
tanrılar tərəfindən yaradıldığını qeyd edirdi. Avqustin Platondakı bu
“tanrılar”-ın mələklər üçün istifadə edilən yalnış kəlimə olaraq nəzərdən
keçirir. Avqustinus eyni zamanda Platonda olduğu kimi, duyğular vasitəsilə
qavranılan dünyanın əzəli və əbədi olan ideyalar aləmindən daha aşağı olmasını
qəbul edirdi.[5, səh 106] Avqustin Tanrının onu şəfa tapması üçün Platonun
Yunancadan latıncaya tərcümə edilmiş kitabları ilə tanış etdiyini qeyd edirdi.
Avqustin bu kitablarda başlanğıcda sözün var olduğunu, sözün başlanğıcda Tanrı
ilə birlikdə olduğunu və Tanrının söz olduğunu oxuduğunu qeyd edir.[7, səh 393]
Avreli Avqustin Platonun əsərləri sayəsində öz mənliyinin daxilinə enməli
olduğunu anladığını və bunun da Tanrı sayəsində baş verdiyini ifadə edir.[7, səh
399] Avqustin özünün də qeyd etdiyi kimi, Platonun əsərlərindən cisimsiz gerçəkliyin
var olması ilə bağlı həqiqətləri öyrənmişdi. O, tanrıya müraciətlə yazır ki, əgər
daha əvvəl dini kitabları oxumuş olsaydı, o zaman Platonun kitabları onun
sağlam təməllər üzərinə qurduğu inanc sistemini dağıdardı. Ancaq bəlkə də, sadəcə
Platonun kitablarını oxumaqla bu inanca yiyələnə biləməyin mümkünlüyünü düşünəcəyini
qeyd edir.[7, səh 423]
Platon
ruh və bədən dualizmini irəli sürürdü. Ona görə maddi olan, insanın bədəni onun
ruhu, daha üstün olan ideya üçün zindan rolunu oynanırdı. Maddi olan insan bədəni
şərin(həzzlər) potensial daşıcısı, şərin ortaya çıxaması üçün münbit zəmin
rolunu oynanırdı. Ruh ancaq bədən öldükdən sonra öz azadlığına qovuşa bilərdi,
bu ruhun özü üçün bir qurtuluş mahiyyətinə malikdir. Bədəndən ayrılan və
qurtuluş tapan ruh özlüyündə Palton fəlsəfəsində digər dünyanın varlığına yönəlmiş
fikirlərin meydana gəlməsi ilə nəticələnirdi. Rassel bu anlayışı xristian və yəhudi
düşüncəsindəki “Göydəki krallığın” formalaşması ilə eyniləşdirirdi.[5, səh 39] İlkin
dönəmlərdə Paltona məxsus bu ideyalar xristianlar tərəfindən çox asan formada qəbul
olunması üçün olduqca əhəmiyyətli idi. Platon fəlsəfəsinə olan maraqla bağlı önəmli
amillərdən biri Xristianlıq düşüncəsindəki Ata, Oğul və Müqəddəs ruh üçlüyü və
onların əsaslandırılması ilə bağlı fikirlər idi. Platon “Timeos” adlı dialogunda dünyanın formalaşmasında 3 mühüm amilin
varlığını qeyd edirdi. Bunlar ilkin yaradıcı Tanrı olan Demiurg, Demiurgun
dünyanı yaratmaq üçün müraciət etdiyi ideal formalar və nəticədə yaradılmış
olan dünya. Bu məsələ ilə bağlı Orta Əsrlərin sonuna doğru tək varlıqda birlik
və çoxluq kimi iki anlayışın bir yerdə olmasına qarşı çıxan, Aristotel məntiqindən
çıxış edərək fərdi olmayan maddələrin varlığını qəbul etməyən Roscelliniyə yönəldilmiş
ittihamlar[8, səh 269] Platona olan ehtiyacın Xristianlığın mühüm elementlərinin
əsaslandırılması üçün vacib olduğunu ifadə edir. Ümumi anlayışlar probleminə
yanaşmada Aristotel qeyd edirdi ki, yalnız fərdi varlıqlar vardır, ümumi
anlayışlar isə onlara sonradan verilmişdir. Müqəddəs üçlük məsələsinin
Aristotel məntiqi ilə izah edilməsi isə özlüyündə yeni çətinliklər yaradırdı.
Bu çətinlikləri, hətta mümkünsüzlüyünü (Umberto
Ekodan) ilk olaraq duyanlardan biri Anselm idi. Eyni zamanda Demiurgla
bağlı olan Platonun fikirləri yaradılışla əlaqədar Xristianlıq fikirləri üçün də
olduqca mühüm əhəmiyyət kəsb edirdi. Aristotelin yaradılış haqqındakı fikirləri
isə Xristianları qane edəcək səviyyədə deyildi. Belə ki, Platonun kainatı idarə
etməyə həvəsli Demuirg-undan fərqli olaraq Aristotelin tanrısı ağıl və zəka
idi, kainatı idarə etmək, işinə qarışmaq kimi bir istəyi də yox idi. O sadəcə
olaraq ən mükəmməl varlıq idi və mükəmməl varlıq da ancaq mükəmməl şeylər
haqqında düşünə bilərdi, yəni ancaq özü haqqında. Aristotelin tanrısı ümumilikdə
özü özünü düşünən bir varlığa bərabər idi.[9, səh 31] Aristotel eyni zamanda
Xristian düşüncələrin əksinə olaraq tanrının kainatı yaratmadığını qeyd edirdi.
Onun fikrincə maddə və onun müxtəlif şəkillərdə təzahür etməsinə səbəb olan
forma əbədi olaraq mövcuddur. Bu amil Orta əsr Avropa fəlsəfəsinin dini
mövqeyinin şərtlərinə cavab vermirdi. Platonun isə ilkin dönəm xristianlıqda əvəz
edilməz dərəcədə əhəmiyyətli fikirlərə malik olan filosof kimi qəbul olması
böyük ölçüdə bu səbəblərdən qaynaqlanırdı.
Orta əsrlər
fəlsəfəsində Platonun ideyaları heç də Antik Yunan fəlsəfəsindəki Platonun
fikirləri ilə eynilik təşkil etmirdi. Əksinə Orta əsrlər fəlsəfəsi Platonun
dini olmayan bütün fikirlərindən imtina etmişdi. Əvəzində isə dini motivli və
xristianlıq üçün münasib sayıla bilən ideyalarını daha da genişləndirmişdir. Bertran
Rasselə görə, Platon ideyalarının bu formada dəyişdirilməsi birbaşa olaraq
Plotin-in fəaliyyəti və Yeni-platonçuluq ilə əlaqədardır. Aristotel haqqındakı
fikirlər isə Platona olduğu qədər mütərəqqi deyildi, o, haqqında olan azsaylı məlumatlarda
sadəcə dialektik filosof kimi nəzərdən keçirilirdi. Platon isə dini yönümdən və
ideyalar haqqında təlimin yaradıcısı kimi nəzərdən keçirilirdi.[5, səh 184]
Platonun
Orta Əsrlər fəlsəfəsindəki yerinə nəzərə saldığımızda ona məxsus çox az sayda məlumatın
mövcud olduğunun şahidi oluruq. Platonun “Timeos”
dialoqu IV əsrdə Yeni-Platonçu fikir adamlarından olan Calcidus tərəfindən
latın dilinə tərcümə edilmişdir. Platonun digər əsərləri isə, xüsusilə də “Fedon” və “Menon” dialogları XII əsrdə Siciliyalı Henrix Aristippus tərəfindən
tərcümə edilmişdir. Yeni-platonçuluq haqqında məlumatlar isə əsasən Mark Tulli
Siseronun “De RePublica” əsərinin şərhini
vermiş Anbrosius Macrobiusu yazılarından əldə edilmişdir. Siseronla yanaşı
Snekanın əxlaqi əsərlərində erkən orta əsrlərə aid olan fəlsəfi fikirlər,
xüsusilə də Stoiklər və Epikürçülük haqqında məlumatlar Orta əsr Avropa fəlsəfəsi
üçün əsas bilik mənbəyi rolunu oynayırdı.[2, səh 352]
Orta əsr
Avropa fəlsəfəsi üçün xarakterik olan cəhət kimi Platon ideyaları ilə
Xristianlığın uyğunlaşdırılması nəzərdən keçirilsə də Aristotelin bu dönəmdəki
rolu inkar edilə bilməz. Ümumi olaraq Platon fəlsəfəsi Avreli Avqustin, Aristotel
fəlsəfəsi isə Akvinalı Foma və onun tərəfdarlarının düşüncəsinə ciddi təsir
etdiyi məlumdur. Lakin burada əsas olan Orta əsr Avropa fəlsəfəsinin
Aristotelin fikirləri ilə Fomadan daha əvvəlki dönəmlərdən etibarən tanış
olması ilə bağlı problemi nəzərə çatdırmaqdır. Aristotelin Orta əsr Avropa fəlsəfəsinə
tanıdılması birbaşa olaraq Severinus Boetsius-un(480-526) adı və fəaliyyəti ilə
bağlıdır.
Umberto
Eko Lorenzo Vallanın fikirlərinə istinad edərək Boetsius-u “Romalıların
sonuncusu və sxolastiklərin ilki” olaraq nəzərdən keçirir.[2, səh 363] Azərbaycan
müəlliflərindən Aydın Əlizadə isə onu sadəcə olaraq “Sonuncu romalı” formasında
nəzərdən keçirir.[1, səh 116] ”Sonuncu romalı” məsələsi eyni zamanda Gibbon tərəfindən
də işlədilmişdir ki,[6, səh 40] bunun çox güman ki, müəllifin istinad etdiyi mənbə
kimi götürülmüş olması böyük ehtimaldır. Beotsius öz dönəmində dövlət idarəçiliyində
iştirak etməsi ilə yanaşı filosof və tərcüməçi kimi rəğbət görmüşdür. Onun adı
ilə bağlı olaraq Platon və Aristotelin əsərlərinin latın dilinə çevrilməsi
istiqamətində gördüyü işləri nəzərdən keçirmək mümkündür. Beotsius Qədim Yunan
mənbələrinə adi olan əsərlərin tərcüməsində əsas məqsəd kimi, Yeni-platonçu
filosof Porfirius-un müxtəlif nəzəriyyələrin təməl nöqtələrdəki eyniliyi, əvvəlki
Antik Yunan mədəniyyətinin yaratmış olduğu nümunələrinin öz dövründə qorunub
saxlanılması, mühafizə edilməsi ilə başlı düşüncəni mənimsəmişdi.[2, səh 364]
Bu baxımdan Qərb düşüncə tərzində “klassik” dönəm adlandırılan dövrün sonuncu
nümayəndəsi kimi Boesius-un adı qeyd olunur.[2, səh 365] Boetsius Aristotel və
Platonun əsərlərini tərcümə etmək məqsədini gənc yaşda siyasi məsələlərdən
dolayı edam olunması səbəbi ilə tam olaraq yerinə yetirə bilməmişdir. Baxmayaraq
ki, Boetsius Palton-un əsərləri ilə Yeni-platonçular, xüsusilə də Porfirius
vasitəsilə, tanış idi, lakin müstəqil formada Platonu tərcümə etdiyini demək
doğru olmaz. 1150-1160-cı illərə qədər Orta əsrlər Avropası Qədim Yunan fəlsəfəsi
ilə bağlı çox az məlumata sahib idi. Bu məlumatlar əsasən Aristotelin tərcümə
edilmiş “Kategoriyalar”, “İlk analitika”,”Topika”, “Sofistlərin təkzib
edilməsi” və “Şərh haqqında” yazıları, Porfiriusun “İsagoge” əsəri idi. Orta əsr Avropa fəlsəfəsində bu dövrə qədərki məntiqi
təfəkkür tərzi logico vetus
adlandırılır, XII əsrdə Venesiyalı Jak(James) tərəfindən Aristotelin “Sonrakı analitika” əsəri tərcümə
edildikdən sonra logica nova və nəhayət
Aristotelin “Fizika”, “Ruh haqqında”, “Metafizika” və “Göy haqqında”
əsərlərinin tərcüməsi ilə isə libri
naturalis meydana çıxmış olur.[3, səh 14] Orta Əsrlər Avropa fəlsəfəsinin
xarakterik cəhətlərindən ən önəmlisi birbaşa latın dili istiqamətində olan
inkişafı idi. Qərbi Roma imperiyasının
süqutundan sonra imperiya varisliyi Şərqi Roma(Bizans) tərəfindən sahiblənilmiş,
fəlsəfi istiqamətlər və məktəblər uyğun olaraq Şərqi Roma ərazilərində İsgəndəriyyə,
Afina və Suriyada öz mövcudluğunu davam etdirmişdir. Qərbi Roma ərazilərində isə
Qədim Yunan dilinin demək olar ki, unudulmuş olması, o dildə yazılmış klassik
Yunan əsərlərinin latın dilinə tərcümə problemini ortaya çıxarırdı. Bu
problemin həlli o qədər uğurla həyata keçirilməsə də Orta Əsrlər Avropası üçün
özünəməxsus örnəklərə malik idi.
Boetsius-un bilinən ən mühüm əsəri “Consolatio Philosophiae”(Fəlsəfənin təsəllisi)
adlanır. Əsər özlüyündə məzmun baxımından çoxsaylı mübahisələrə səbəb olmuşdur.
Xüsusilə də əsərdə Boetsius-un xristian inanc sisteminə və onun tezislərinə yer
verməməsi müxtəlif müəlliflər tərəfindən fərqli formada nəzərdən keçirilmişdir.
Aydın Əlizadə bunun əsas səbəbi kimi nəzərdən keçirdiyi yanaşma kimi Boetsius-un
ölümünə yaxın xristianlıqdan imtina etməsini qeyd edir.[1, səh 118] Umberto Eko
isə əksinə Boetsius-un xristian düşüncə tərzi əvəzinə Prokl-a əsaslanan və Yeni-platonçu
düşüncəni əks etdirən əsərdə teologiyaya yer olmamasını normal qəbul edir. Bertrand
Rassel isə Boetsius-ün üzərində pagan fəlsəfənin təsirləri ilə izah etməyi
uyğun görür.[5, səh 120] Digər tərəfdən də Boetsius-un müasir dönəmdə kitabın
III hissəsində yer alan O qui perpetua mundum ratione gubernas (sən ki, əbədi
gücünlə dünyanı idarə edirsən) misrasına
əsaslanan müəlliflərin Boetsius-un Müqəddəs kitabdakı “Müdriklik kitabına”
dolayı yolla işarə etdiyinə inanırlar. Bunun nəticəsində də əsərin Antik fəlsəfə
ilə xristian düşüncə tərzi arasında bir növ dolayı olsa da sintez təşkil
ediyini qəbul edirlər. [2, səh 369]
Boetsius Fəlsəfənin təsəllisi əsərində Sokrat,
Platon və Aristoteli gerçək filosoflar hesab edir, Epikürçüləri və Sofistləri
ilə bu addan məhrum edir. Onların geri qalan digər filosoflar kimi bu adı “mənimsədiklərini”
qeyd edir. Boetsius Pifagorun “Tanrını izlə” fikrini qəbul etdiyini qeyd edir.
Bu onu xristian inancı ilə bir araya gəlməyən
bir anlayışdır. Onun fikrincə müqəddəslik və xoşbəxtlik eyni şeylərdir. Xoşbəxtlik
özündən əvvəlki düşüncə sahiblərinin qeyd etiyi kimi, həzz almaq demək
deyildir. Boetsius Yeni-platonçuluqdan daha çox Platon fəlsəfəsinə yaxındır. O
Fəlsəfənin təsəllisi əsərinin başlanğıcında Platonun “Timeos” dialogundan qısa hissəyə yer verir, Platonun metafizik
fikirlərini əks etdirdiyi kimi(mükəmməl olmayan bir şey mükəmməl olanın
varlığını sübut edən bir əskiklikdir), onun şər probleminə baxışını da əks
etdirir. Boetsius burada Tanrı anlayışını pantezim çərçivəsinə yüksəldir. Lakin
bu yüksəltmə xristianlar tərəfindən o dərəcədə dəhşətli bir amil kimi nəzərdən
keiçirilmir. Çox güman ki, bu elə
Rasselin qeyd etdiyi kimi Boetsiusa paganizmin təsiri ilə izah oluna bilərdi.
Boetsiusa görə, Müqəddəslik və Tanrı eyni dərəcədə xeyirdirlər və təbii olaraq
eyniliyə malikdirlər. İnsanlar tanrılığa qovuşmaqla xoşbəxtlik əldə edirlər.
İlahiliyi əldə edənlər Tanrıya çevrilirlər. Ancaq təbiəti etibarilə yalnız tək
tanrı mövcuddur və tək tanrının tərkibinə daxil olmaqla müxtəlif tanrılar
mövcud ola bilər(Platonun fikirləri).
Tanrı üçün əsas olan hər zaman xeyirdir. Tanrı şər əməl törətməz, şər xeyirin
olmadığı heçlikdir. Çünki ancaq belə olduğu təqdirdə tanrı hər şeyə qadir olan
sifətinə yiyələnə bilər(xristianlıq).
Müdrik insanlar hər zaman güclüdür, şər əməllər görən insanlar isə hər zaman
üçün gücsüzdür. Ona görə də şər işi görən insanlar alacaqları cəzadan vaxtında
uzaqlaşsalar onların özü üçün daha yaxşı nəticələrə gətirib çıxarar. Çünki, cəhənnəmdəki
cəzadan qurtulmaq mümkün deyildir (xristianlıq).
Buradan da göründüyü kimi Boetsiusun fikirlərində Sokrat, Platon və Aristotellə
yanaşı Sofistlərin fikirləri ilə uyğunluğa malik olan və Snekadan bəhrələnilmiş
əxlaqi fikirlərə(xüsusilə dostluğun çox xoşbəst bir şey-nen olması ilə bağlı) də yer verilirdi.[5, səh 120-121] Rassel eyni
zamanda Boetsius-un əsərinin yazıldığı dövr üçün xarakterik olan inanca əsaslanan,
imkansız bilik əldə etmək, günah qorxusu kimi amillərdən uzaq olduğunu, fəlsəfi
düşüncə və rahatlıq ifadə etdiyini qeyd edir. Belə bir vəziyyətə Qərb fəlsəfəsində
Nyutona qədərki dönəm ərzində rast gəlinmədiyini ifadə edir.[5, səh 121] Boetsius
kimi dini düşüncə və ehkamçılıqdan uzaq olan başqa bir Orta əsr filosofu düşünə
bilmədiyini qeyd edir.[5, səh 122]
Boetsius logica vertus adlanan köhnə məntiq-in
ortaya çıxmasında ən önəmli orta əsr filosofu hesab olunur. Təsadüfi deyildir
ki, bəzi müəlliflər Boetsius-un tərcümələri və tərcümə əsərlərinə yazdığı şərhlərə
əsaslanan məntiqi düşüncələrinin hakim olduğu XII əsrə qədərki periodu
“Boetsius dövrü” kimi nəzərdən keçirir.
Boetsius-un məntiq sahəsindəki
əsas semantik fikirləri Aristotelin “Kategoriyalar” və “Şərhlər
haqqında” əsərləri və Boetsius-un
özünün “De Trinitae” əsəri və tərcümələrinə
yazdığı məntiqi şərhlər əsasında formalaşmışdır. Bu amil Orta əsr Avropa fəlsəfəsində
Aristotelin qiymətləndirilməsi ilə bağlı olaraq qarşımıza çıxan ilk önəmli müsbət
örnəklərdən hesab olunur. Porfirius Yeni-paltonçuluğun nümayəndəsi olmaqla
Plotinin şagirdi hesab olunur və onun əsərlərini yığmış və yaymışdır.
Boetsius-un tərcümə predmetlərindən digəri olan Porfirius isə Yeni-platonçu fəlsəfəyə
Aristotel məntiqini daxil etməsi ilə fərqlənən filosof idi. Boetsius isə
Aristotelin “Kategoriyalar” kitabının
tərcüməsini Porfirius-un İsagoge əsərinə
ön söz kimi əlavə etmişdir. Porfiriusdan tərcümələrlə birlikdə Boetsius vasitəsilə
Aristotel məntiqi Orta əsr Avropa fəlsəfəsinə keçmək imkanı əldə etmişdi.[6, səh
131]
Boetsius “yaradılmış varlıq”(quod est) və “var olan”(quo est) olmaqla iki anlayışı nəzərdən
keçirir. Bu anlayışlar Zeynəddin Hacıyevdə “mövcudluq” və “mahiyyət” formasında
nəzərdən keçirilir. Onun fikrincə bu iki anlayış Latınların metafizika haqqında
düşüncələrinin çıxış nöqtəsini təşkil edir. Boetsius-a görə, yaradılmış olan
üçün “varlıq” ayrı bir mövcudluqdur, “var olan” ayrı mövcudluq. Yalnız Tanrı
üçün isə bunların hər ikisi eynidir(unum
habet), Tanrı həm var olandır, həm də olduğu şeydir.[3, səh 76] Lakin onu
qeyd etməliyik ki, başa düşülən mənada varlıq problemi Orta əsrlər fəlsəfəsi ərzində
müzakirə predmeti deyildir. Yalnız XIII əsrdən etibarən Orta əsr Avropa fəlsəfəsi
varlıq problemi ilə tanış olur. Ona qədər isə əsas problem təbiətdəki
varlıqları ifadə edən kategoriyaların dili ilə ilahi gerçəkliklərinin
kategoriyal dili arasındakı münasibətdir. Yəni ontologiya ilə teologiya
arasındakı əlaqə problemi. Varlığın müxtəlif formalarda təzahürü əvəzinə Orta əsr
Avropa fəlsəfəsi üçün əsas olan çoxsaylı kateqoriyaların Tanrının mahiyyətini
hansı dərəcəyə qədər ifadə edə biləcəyini müəyyən etməkdir.[3, səh 75] Aristotel
qeyd edir ki, bir şeyi başa düşmək, onun haqqında tam biliyə sahib olmaq üçün
onun mahiyyətini anlamaq lazımdır. Şeylərin mahiyyətini öyrənmək üçünsə o,
kategoriyalardan istifadə edilməsinin önəmli olduğunu qeyd edirdi.
Kateqoriyalar Aristotelə görə, reallığın ən əhəmiyyətli tərəflərini əks etdirən
anlayışlardır. Bu anlayışların sayı 10-dur.[4, səh 86] Boetsiusa görə, bütün
kategoriyalar Tanrıya aid edildiyi zaman məna fərqliliyi yaradır. Çünki,
kategoriyalar uyğun olaraq hər hansı substansiya üçün aksidensiya xüsusiyyətlərini
yerinə yetirir, ona görə də Tanrı-nın hər hansı keyfiyyət halında təsvir edilməsi
insanlara aid olan kategoriyaların Tanrıya şamil edilməsi məna fərqliliyi
yaratmış olur. Beləliklə Tanrı ən ilkin substansiyadır, lakin eyni zamanda
substansiyadan daha üstün bir varlıqdır ki, substansiya üçün önəmli olan
aksidensiyaların daşıyıcısı ola bilməz.[1, səh 117]
Antik
Yunan fəlsəfəsində varlıq daha çox “dilə gətirilən” formada başa
düşülürdü. Bu dilə gətirilmə öz ilkin formasında “danışmaq”-la
xarakteriz edilən anlayış idi. Yəni bir şeyin var olması üçün onun haqqında
danışmaq lazım idi. Haqqında danışla bilməyən, dilə gətirilə bilməyən isə təbii
olaraq “varlıq” hesab olunmurdu. Antik Yunan fəlsəfəsində Sofistlərə qədər
danışıqda ifadə olunanla onun göstərdiyi obyekt arasındakı münasibətlər daha
çox birmənalı idi. Sofistlərin meydana çıxması və onların həqiqətin müxtəlifliyini
qeyd edərək söz oyunları üzərindən müxtəlif fikirlərin həqiqiliyini isbata
çalışmaları labüd formada dilə gətirilənlə, onun göstərdiyi obyekt arasıdakı məna
fərqliliyinin əsasını qoymuş oldu. Sofistlərə görə, hər kəsin mövqeyi nisbidir,
ola bilər ki, ağ olan bir şey başqası üçün həm də qara olmuş olsun.[4, səh
61] Bu zaman ortaya belə bir problem çıxır, əgər bir şey fərqli insanlar üçün
müxtəlif həqiqəti ifadə edirsə və həqiqətin maddi əsası dəyişməz qalırsa, o
zaman dəyişiklik sadəcə olaraq danışıqdadır, göstəriləninin ifadə
olunmasındadır. Sofistlər bu baxımdan varlığın maddi tərəfi ilə onu ifadə edən
anlayışı bir-birindən ayırırdılar. Ancaq
bu ayrılıq hələ ciddi problem səviyyəsində nəzərdən keçirilə bilmirdi. Bu problemi
Platon özünün “Cratylus” adlı dialogunda qeyd etdiyi formada “ağac” sözü
ilə maddi olaraq var olan ağac arasında hansı əlaqəninin olması fikrini irəli
sürür. Dialogun gedişində Platon iki nümunədə problemə olan yanaşmasını ifadə
edir. Onun fikrincə birinci halda işlətdiyimiz “ağac” anlayışı hamımızın bu
anlayışın nəyi ifadə etməsi ilə bağlı gəldiyimiz razılığa əsaslanır. İkinci
halda isə Platona görə, “ağac” anlayışı ilə gerçək ağac arasında müəyyən bir
maddi əlaqəyə ehtiyac vardır. Platonun ideyalar aləmi və maddi aləm haqqındakı
fikirlərini də nəzərə aldığımızda qarşımıza ilkin anlayış və onun maddi formada
ifadəsi arasında ayrılıq probleminin ortaya çıxdığını görə bilərik. Bu
probleminin sahəsi Antik Yunan düşüncəsində bir şeyin var olmasını müəyyən edən
danışıqda öz əksini tapırdı. Daha sonra Aristotel kategoriyaların idraki və
varlıq kategoriyaları olmaqla iki növünü fərqləndirirdi. Belə ki, anlayışları,
ifadələri əks etdirən idrakı kategoriyalar, hansı ki, bunlar maddi
deyil, sadəcə danışığımızda ortaya çıxan kategoriyalardır və dərk edilən
obyektlərin gördüyümüz maddi varlıq formaları olan varlıq kategoriyaları,
bunların isə uyğun olaraq maddi əsası vardır. Məhz bu ikili ayrım, ifadə
olunanın, danışılanın obyektin(subyektin) özü ilə qarşılıqlı əlaqəsinin müxtəlif
formaları məsələsi daha sonralar Porfirius tərəfindən yeni bir problem kimi nəzərdən
keçirilmişdir. Porfirius İsagoge-də ifadə edilənlə subyekt arasındakı əlaqələri
növ, cins, fərqləndirici xüsusiyyət, keyfiyyət və təsadüf kimi beş əsas başlığı
nəzərdən keçirir. Bu anlayışlar Aristotelin “Topica” əsərindən
götürülmüş anlayışlardır. Porfirius bu beş anlayışı əsas alaraq Aristotelin
kategoriyaları arasında müəyyən bir yerarxik sistemin olması fikrini irəli
sürürdü. Belə ki, əgər maddə kategoriyasını əsas olaraq qəbul etsək, o zaman
“maddi olan” və “maddi olmayan” fərqləndirici xüsusiyyətləri ilə yeni bədən və
ruh olmaqla iki cins müəyyən etmiş oluruq. Digər bir fərqləndirici xüsusiyyət
kimi “canlı” anlayışını götürsək bədənin “canlı” və “mineral” olmaqla iki fərqli
cinsini də yaratmış oluruq. Uyğun olaraq “yaşayan canlılar” xüsusiyyəti ilə
heyvan və bitki cinsləri, onlar arasında da “məntiqilik” keyfiyyəti ilə insan
növünü yaratmış oluruq. Kategoriyaların bu yerarxiyası Porfirius ağacı
adlandırılır. Boetisus da Antik Yunan ənənəsini davam etdirərək “Məntiqin
bütün incəsənətinin danışıqla bağlı olduğunu” qeyd edirdi.[6, səh
133]
Porfirius İsagoge əsərinin əvvəlində Aristotelin
fikirlərinə əsaslanaraq qeyd edir ki, hər bir şey özlüyündə müəyyən bir növə və
cinsə aiddir.[3, səh 117] (Aydın Əlizadəyə görə, bu məsələnin yer aldığı əsər “Aristotelin kategoriyalarına giriş və şərhlər”
əsəridir.[4, səh 257]) O, zaman növlər və cinslər müstəqil formada mövcuddurmu,
yoxsa saf idrak içərisindəmi vardır. Yəni müəyyən maddi xüsusiyyətlərə
malikdirmi? Hiss edilə bilənin daxilində mövcuddur, yoxsa ondan kənardadır? Porfirius
bu sualları cavabsız qoyur. Boetsius isə suallara növlər və cinslərin ağıldan kənarda
möcud olması, ruhi mahiyyətə malik olması, lakin fərdlərdən ayrılmaz olmasını(Aristoteldəki ruhun bədəndə olması kimi)
qeyd edərək cavab verir. Cinslər və növlər xüsusilikdən mücərrədləşmiş bənzərliklər,
oxşarlıqlardır. Ayrı-ayrı şəxslərdən insanlığın təsvirlərini(similitudo humanitatis) toplamaq sürəti
ilə meydana gəlirlər.[6, səh 133]
Aristotel məntiqində əsasən ümumi anlayışların
res (maddi varlıq, şey) yaxud da voces (səs) olması ilə bağlı problem öz əksini
tapır. Yəni ümumi anlayışlar maddi olaraq mövcuddurlarmı, yoxsa onlar sadəcə
danışıqda mövcuddurlar? Sualının verilməsi ilə ortaya çıxmışdır. Bu sualı
ünvanlayan Porfiriusdur.[8, səh 277] Beləliklə Porfirius ilk dəfə olaraq Orta
Əsrlər fəlsəfəsi ərzində müzakirə mövzusuna çevrilmiş “ümumi anlayışlar”
problemini ifadə edirdi. Porfirius-un əsərinin tərcüməçisi kimi Boetsius da
uyğun olaraq problemə yanaşma sərgiləmişdir. Boetsius “ümumi anlayışlar” dedikdə
“çoxluq üçün ortaq olan” xüsusiyyətləri nəzərdən keçirirdi. Lakin bu məsələ
Aritotel və Porfiriusun əsərlərində “çoxluğun nəticəsi” kimi ifadə olunur. Yəni
müəyyən bir qrup predmet vardır və ümumi anlayışlar da onlara aid edilən
xüsusiyyətlərdir.[3, səh 118] Boetius üçün ortaq əlamətlərə malik olan şeylər
növü və cinsi təşkil edərək ümumi anlayışları meydana gətirir. Porfirius üçün isə
“ümumi” sadəcə olaraq anlayış kimi vardır və nəzərdə tutulan bütün şeylərin
birləşməsi həmin bu ümumini yaradır. Boetsius “ümumilik” dedikdə latınca ifadəsi
olan in
multis nəzərdə tutur, yəni “içində ümumi olan”, çoxluqda ortaq olan.
Porfirius idə “ümumilik” adı altında nəzərdən keçirdiyi de multisdir ki, bu da
anlayış (predikat) formanı ifadə edir, yəni hamısına aid edilən [3, səh 118]
Boetsius-un Aristotel və
Porfirusdan etdiyi tərcümələr hesabına “ümumi” anlayışlarla bağlı problem Orta
Əsrlər Avropa fəlsəfəsinə keçid etmək imkanı qazanmış və uzun bir müddət əsas
müzakirə mövzusu olmağı bacarmışdı. Orta Əsr Avropa fəlsəfəsinin iki mühüm cərəyanı
olan nominalizm və realizmin meydana gəlməsi ilə nəticələnmişdi.
Ümumilikdə Boetsiusun fəlsəfəsi
Orta Əsrlər Avropa fəlsəfəsi üçün olduqca mühüm əhəmiyyətə malikdir. Belə ki,
Antik Yunan fəlsəfəsi daha çox Platon fəlsəfəsinin davamı formasında inkişaf
etmişdir. Aristotel və onun peripatetik ənənələri isə təxminin bizim eranın III
əsrindən etibarən tənəzzülə uğramışdır. Platonizmin sonuncu beşinci dövrü olan Yeni-platonizmin
inkişafı və yayılması, xüsusilə də Roma mütəfəkkirləri arasında rəğbət görməsi
latın dilli ədəbiyyatlarda Platonun ideylarına yer verilməsi ilə nəticələnmişdi.
Aristotelin ideyaları isə əsasən yunan dilində qalması və latın dilinə tərcümə
olunmamış olması ilə fərqlənirdi. Yalnız Porfiriusda Aristotel məntiqinin Yeni-platonist
ideyalar arasında yerləşdirilməsinə rast gəlirik. Daha sonra isə Porfiriusa əsaslanmaqla
Boetsius tərəfindən Aristotelin latın dilinə tərcümə edilməsi və beləliklə də,
Orta əsrlər Avropa fəlsəfəsinə Aristotel məntiqinin daxil olmasının şahidi
oluruq. Bertran Rasselə görə, katolik fəlsəfəsinin Platondan uzaqlaşaraq
Aristotelə meyllənmiş olması yalnış bir şeçim idi. Onun fikrincə Platon düşüncələri
dinə daha yaxın mövqeyə malik idi və Xristian teologiyası da ilkin zamanlardan
bəri Platonu əsas kimi mənimsəmişdi. Platon biliyin duyğu üzvlərimiz vasitəsilə
qavradıqlarımız deyil, bir növ xatırladıcı ideya olduğunu qeyd edirdi.
Aristotel isə daha çox empirik yanaşması ilə fərqlənirdi. Akvinalı Foma isə
Platon əvəzinə Aristotelin düşüncə tərzini mənimsəməklə istəməsə belə Platoncu ideyalardan
elmi müşahidəyə aparan yolun təməllərini atmışdır.[5, səh 264]
Araz Əliyev
Ədəbiyyat
- Əlizadə, Aydın. “Xristianlıq, tarix və fəlsəfə”, Əbilov, Zeynalov və oğullar, Bakı, 2007.
- Eko, Umberto. “İl Medievo”, (tr. L.T. Basmaçı) I cild, Alfa, 2014.
- De Libera, Alain. “La Philosopkie Medievale”, Presses Universitaires de France, 1989.
- Əlizadə, Aydın. “Antik fəlsəfə tarixi”, Bakı, 2016.
- Rassel, Bertrand. “Batı felsefesi tarihi”(Ortaçağ), Bilgi yayınları, 1972.
- Kenny, Anthony. “Ortaçağ felsefesi”, Küre yayınları, 2011.
- Avgustin, Avreli, “İtiraflar”, Kabalcı, İstanbul, 2010.
- Eko, Umberto. “İl Mediovo”, (tr. L.T. Basmaçı) II cild, Alfa, 2014.
- Arslan, Ahmet. “İlkçağ felsefe tarihi”, III cild, Aristoteles, İstanbul Bilgi Universitesi, 2007.
Yorumlar
Yorum Gönder